Këlliçi reagon ashpër kundër deklaratës së Kryeministrit Rama për autizmin: “Përdorimi i gjuhës bullizuese është skandal”

Drejtuesi politik i Partisë Demokratike për Qarkun Tiranë, Belind Këlliçi, ka reaguar ashpër ndaj një deklarate të Kryeministrit Edi Rama, duke e cilësuar përdorimin e gjuhës fyese dhe bullizuese ndaj personave me autizëm si një skandal. Këlliçi thekson se kjo deklaratë tregon pandjeshmërinë dhe injorancën e Kryeministrit ndaj grupeve më të ndjeshme të shoqërisë.

Në postimin e tij në rrjetet sociale, Këlliçi shprehet se deklarata e Ramës, ku ai përdor termin “politikisht je autik, nuk je mirë”, është një tjetër shembull i gjuhës diskriminuese dhe bullizuese që Kryeministri ka përdorur, duke përmendur gjithashtu dhe deklaratat e tjera të tij, si ato për vajzat dhe fëmijët. Ai thekson se personat me autizëm janë individë të prekur nga një çrregullim psikiatrik, i cili mund të shkaktojë vështirësi në sjellje dhe marrëdhënie personale, por ndonjëherë edhe aftësi të jashtëzakonshme në fusha të ndryshme, përfshirë shkencën dhe artin.

Këlliçi kërkon ndërhyrjen e institucioneve përkatëse, si Komisioneri për Mbrojtjen nga Diskriminimi dhe Urdhri i Psikologut, për të frenuar përhapjen e kësaj kulture bullizuese dhe diskriminuese. Ai përfundon duke theksuar se një shoqëri e qytetëruar vlerësohet nga mënyra si trajton dhe mbron anëtarët më të dobët të saj.